22-nji iýunda Gurban Berdiýew resmi taýdan Azerbaýjanyň «Turan» futbol klubunyň baş tälimçisi boldy. Taraplaryň degişli ylalaşyga gol çekendiklerini klubuň sport direktory Samed Nasibow habar berdi.
Berdiýew bilen baglaşylan şertnama häzirlikçe iki ýyllyk bolup, ýene bir möwsüm uzaldylyp bilner.
«Ilkibaşda biz onuň bilen bir ýyllyk şertnama baglaşyp, ýene bir möwsüm uzaltmak mümkinçiligini hödürlemek isledik. Muňa garamazdan, gepleşikleriň barşynda ylalaşygyň möhleti üýtgedi.
«Turan» Gurban Berdiýewiň işini öwrendi we biziň klubumyz bu hünärmen bilen uzak möhletleýin taslamalary amala aşyryp biler. Biz Gurban Bekiýewiçiň öňünde möhüm maksatlary goýduk. Şolaryň ilkinjisi toparyň Azerbaýjanyň çempionatynda şowly çykyş etmegi we Konferensiýalar ligasynda degişli tapgyra düşmegi bilen baglydyr.
Tälimçi esasy ünsüni biziň akademiýamyzyň işine gönükdirer. Berdiýew bize täze klub gurmaga we toparyň geljekki üstünlikleri üçin pugta binýat döretmäge kömek eder» — diýip, «Turanyň» sport direktory Samed Nasibow belledi.
«Turan» Azerbaýjanyň çempionatynyň geçen möwsümini altynjy orunda tamamlady.
Türkmen hünärmeni «Rubin» bilen iki gezek Russiýanyň çempiony bolupdy. 2023-nji ýylyň tomsundan Mahaçkalanyň «Dinamo» toparyny türgenleşdirip başlady. Şu ýylyň fewralynda bolsa öz islegi bilen klubuň baş tälimçisi wezipesini terk etdi we möwsümiň ahyryna çenli toparyň prezidentiniň geňeşçisiniň wezipesini ýerine ýetirdi. Şeýlelikde, «Dinamo» 2023/24-nji ýyllaryň futbol möwsüminde Birinji ligada ikinji orny eýeledi we taryhynda ilkinji gezek Russiýanyň Premýer-ligasynda çykyş etmäge ýollanma gazandy.
