Aşgabat şäher prokuraturasynyň işgäri Suwhan Öwezgeldiýew Russiýa Federasiýasynyň Burýatiýa Respublikasynyň Ulan-Ude şäherinde geçirilen söweş sambosy boýunça halkara Gran-pri ýaryşynda çempionlyk guşagyna eýe boldy. Türkmen türgeni 88 kilogram agram derejesinde finalda russiýaly Iwan Intýuhowy ýeňip, şeýle üstünlik gazandy diýip, "Türkmenistan: Altyn asyr" elektron neşiri habar berýär.
Söweş sambosynyň ligasy tarapyndan täzelenen düzgünlere laýyklykda geçirilen Gran-pri ýaryşa 8 ýurtdan – Belarusdan, Gazagystandan, Gyrgyzystandan, Mongoliýadan, Russiýadan, Täjigistandan, Türkmenistandan we Özbegistandan 14 türgen gatnaşdy.
Häzirki Gran-pri ýaryşyň esasy aýratynlygy türgenleriň deslapky duşuşyklary geçirmän, öz agram derejelerinde göni finala çykdylar we ýeňijiler çempionlyk guşagyndan başga-da pul baýragyna mynasyp boldular.
Söweş sambosynyň ligasy sportuň bu görnüşini ýaýmak we türgenlere goldaw bermek maksady bilen, 2020-nji ýylyň fewral aýynda esaslandyryldy.
