Nýu-Ýorkdaky Linkoln merkezinde 77-nji “Toni” baýragynyň gowşurylyş dabarasy geçirilip, onda 2023-2024-nji ýyl möwsüminde teatr sungatynda ýetilen iň gowy üstünlikler sylaglandy.
Şeýlelikde, Sýuzan Hintonyň adybir romanyna esaslanan “Kowulanlar” (“Изгои”) mýuzikli iň köp baýragyň eýesi boldy. Prodýuserleriniň biri hökmünde Anjelina Joli çykyş eden bu mýuzikl baş baýragy – “Iň gowy mýuzikl” baýragyny, şeýle-de dalaşgär görkezilen 12 kategoriýadan ýene üç kategoriýada heýkel aldy.
Norwegiýaly dramaturg Genrik Ibseniň 1882-nji ýyldaky pýesasyna esaslanýan “Halk duşmany” (“Враг народа”) sahnalaşdyrmasynda hakykat ugrunda göreşýän we korrupsiýanyň üstüni açýan doktor Tomas Stokmanyň keşbi üçin Jeremi Strong “Iň gowy aktýor” baýragyny aldy.
“Iň gowy aktrisa” amerikaly dramaturg Brenden Jeýkobs-Jenkinsiň tekstine esaslanan “Degişli” (“Надлежащие”) spektaklyndaky keşbi üçin Sara Polson boldy.
“Garri Potteriň” ýyldyzy Deniel Redkliff “Biz gidýäris, gidýäris, gidýäris” (“Мы едем, едем, едем”) sahnalaşdyrmasyndaky işi üçin “Mýuziklde ikinji plandaky iň gowy aktýor” baýragyna mynasyp boldy.
Abraýly “Toni” baýragy 1947-nji ýylda esaslandyryldy we her ýyl Amerikan teatr jemgyýeti tarapyndan berilýär. Baýrak kinematografiýa “Oskarynyň”, “Gremmi” aýdym-saz baýragynyň we“Emmi” telewizion baýragynyň teatr ekwiwalenti hasaplanýar.
