Awstraliýaly režissýor Adam Elliotyň “Ulitkanyň memuarlary” (Мемуары улитки) animasion filmi Anside geçirilen Halkara animasion filmler festiwalynda Gran-pri-ni aldy. Bu barada Variety habar berýär.
Plastilin görnüşde öndürilen film ulitka ýygnaýjy ýalňyz gyz Greýs we garry aýal Pinkiniň peýda bolmagy bilen onuň durmuşynyň üýtgeýşi barada gürrüň berýär. Gahrymanlara Sara Snuk, Jeki Uiwer, Kodi Smit-Makfi we Erik Bana ses berdiler.
“Ulitkanyň memuarlary” Elliotyň 2009-njy ýylda Ansi festiwalynda baş baýraga mynasyp bolan “Meri we Maks” lentasy çykandan soň 15 ýylyň içinde ilkinji işidir.
Eminleriň baýragyny we tomaşaçy gyzyklanmalarynyň baýragyny Gints Zilbalodisiň “Akym” (Поток) multfilmi aldy. Film doly suw basan dünýäde galan pişik barada gürrüň berýär. Bu animasion film öň Kann festiwalynda “Aýratyn garaýyş” seksiýasynda hödürlendi.
Ýatlap geçsek, şu ýyl Ansidäki abraýly festiwala ilkinji gezek türkmen multiplikatorlarynyň işleri-de gatnaşdy. Türkmenistanyň Telewideniýe, radiogepleşikler we kinematografiýa baradaky döwlet komitetiniň “Mahabat” edarasy iki animasion filmi hödürledi: “Ýiten top” we “Meniň oýnum”.
