Kritdäki Kastelion şäheriniň golaýynda täze howa menziliniň gurluşygyna taýýarlyk işleriniň barşynda arheologlar adaty bolmadyk tapyndynyň - labirinte meňzeýän 4000 ýyllyk daş desganyň üstünden bardylar. Bu barada Gresiýanyň Medeniýet ministrligine salgylanýan Phys.org habar berýär.
Bu täsin ýadygärligiň meýdany 1800 inedördül metr. Onuň ajaýyp köşkleri we freskleri bilen meşhur bolan Minoý siwilizasiýasynyň wekilleri tarapyndan gurlandygy çak edilýär.
Desga kiçeňräk otaglara bölünen çylşyrymly içki gurluşy emele getirýän, beýikligi 1,7 metre çenli bolan sekiz basgançakly diwarlardan ybarat. Labirint, megerem, konusly üçek bilen örtülen bolsa gerek.
Arheologlar labirintiň däp-dessurlar üçin ulanylandygyny çaklaýarlar, ol ýerden tapylan köp sanly haýwan süňkleri muňa şaýatlyk edýär.
Daşdan gurlan desgalary ulanmagyň esasy döwri miladydan öňki 2000-nji we 1700-nji ýyllar aralygy bolsa gerek, bu Knoss we Fest ýaly, Kritiň ilkinji köşkleriniň gurlan döwrüne gabat gelýär.
