Dünýäniň dürli künjeginden 1,5 milliondan gowrak musulman zyýaratçy haj parzyny berjaý etmek üçin Mekgä geldi. Bu barada Associated Press habar berýär. Şu ýyl zyýaratçylaryň umumy sanynyň 2 million adamdan geçmegine garaşylýar.
Haj 14 – 19-njy iýunda geçiriler. Anna güni zyýaratçylar tawaf berjaý etdiler, ýagny Mekgede al-Haram metjidiniň howlusynda ýerleşýän mukaddes Käbäniň daşyndan sagat diliniň garşysyna aýlandylar.
Saud meteorologlary haj döwründe yssy howanyň iň ýokary derejä – 48 gradusa ýetip biljekdigini duýdurýarlar. Şeýle-de, hünärmenler tizligi 2,7 m/s-den 10 m/s-e çenli bolan şemal barada habar berdiler.
Haj her ýyl yslamyň esasy mukaddesligi Käbäniň ýerleşýän ýeri bolan Mekgä zyýaratdyr. Ol musulmanlaryň Aý senenamasynyň on ikinji aýynyň başynda amal edilýär. Fiziki saglygy we maliýe ýagdaýy bolan dine ynanýan her bir musulman ömründe, iň bolmanda, bir gezek haj parzyny berjaý etmeli diýlip hasaplanýar.
