“Krasnodaryň” we Russiýanyň milli ýygyndysynyň derwezebany Matweý Safonow “Pari Sen-Žermene” geçdi. Fransuz kluby 25 ýaşly derwezeban bilen 2029-njy ýyla çenli möhlet bilen şertnama baglaşylandygyny resmi taýdan yglan etdi.
Transferiň bahasy 20 mln ýewro boldy, bu hem ony Ýewropa klublaryna geçen russiýaly oýunçylaryň arasynda üçünji gymmat oýunça öwürýär. Ondan öňde diňe Aleksandr Golowin (“Monako”, 30 mln, 2018-nji ýyl) we Ýuriý Žirkow (“Çelsi”, 21 mln, 2009-njy ýyl) bar.
Safonow “Krasnodaryň” ýetişdiren oýunçysy bolup, toparyň düzüminde Russiýanyň çempionatynyň iki gezek bürünç we bir gezek kümüş medalynyň eýesi boldy. Ol “PSŽ-de” Ýewro-2020-niň çempiony, häzirki esasy derwezeban Janluiji Donnarummanyň bäsdeşi bolar.
Safonowyň “PSŽ-ä” geçmegi garaşylýan wakady. Derwezeban bilen klubuň arasyndaky ylalaşyk barada maý aýynyň ahyrynda habar berildi.
