Ýewropa futbol assosiasiýalarynyň bileleşigi (UEFA) Hytaýyň Alibaba Group tehnologiýa holdingi bilen maksatnamalaýyn ylalaşyga gol çekdi. 2033-nji ýyla çenli möhletli bu şertnama guramanyň ýyllyk hemaýatkärlik girdejilerini 1 milliard ýewro çenli ýokarlandyrmaga ýardam eder.
Sportcal neşiriniň berýän maglumatlaryna görä, Alibaba kompaniýasy bulut tehnologiýalary we emeli aň ugurlary boýunça Ýewropa çempionatynyň, Çempionlar ligasynyň, Ýewropa ligasynyň, Konferensiýalar ligasynyň we UEFA-nyň Superkubogynyň resmi hyzmatdaşyna öwrüler. Şol bir wagtda şertnamanyň anyk maliýe şertleri aýan edilmeýär.
Giriziljek iň esasy täzelikleriň biri-de, Alibaba Cloud binýadynda köpburçly gurnalan wideogörnüş ulgamynyň ornaşdyrylmagydyr. Bu tehnologiýa oýundaky pursatlaryň göwrümli gaýtalamalaryny göni ýaýlymda taýýarlamaga mümkinçilik berer we teleýaýlymlara jedelli pursatlary dürli burçlardan görkezmäge şert döreder.
Hyzmatdaşlygyň ýene bir ugry «Qwen» dil modelini ulanmak bilen baglydyr. UEFA emeli aňyň kömegi arkaly awtomat usulda statistikalary taýýarlamagy, maglumatlary dürli dillere terjime etmegi, janköýerler üçin ýörite wideogysgaltmalary döretmegi we sanly hyzmatlary ösdürmegi meýilleşdirýär.
Ylalaşyk elektron söwdany ösdürmegi hem göz öňünde tutýar. Emeli aň gurallary turnirleriň resmi sanly platformalary arkaly ulanyjylara olaryň islegine görä ýörite maglumatlary we harytlary hödürläp bilerler.
Alibaba bilen baglaşylan şertnama UEFA-nyň 2027–2033-nji ýyllar aralygyndaky täze täjirçilik maksatnamasynyň bir bölegidir. Gurama häzirki wagtda her möwsümde alynýan 726,8 million ýewro bolan hemaýatkärlik girdejisini ýylda 1 milliard ýewro ýetirmegi maksat edinýär.
Alibaba bilen bir hatarda, UEFA-nyň ýokary derejeli hyzmatdaşlarynyň sanawynda PepsiCo, AB InBev we Mastercard ýaly brendler bar. Bu ylalaşyklaryň ählisiniň hem güýji 2032/33-nji ýyllaryň möwsüminiň ahyryna çenlidir.
