17 ýaşly awstraliýaly aktrisa Ketrin Laga’aýa 2016-njy ýylyň “Moana” multfilmine esaslanýan Disney-iň adybir filminde Moananyň keşbini aldy. Bu barada Variety habar berýär.
Asly samoaly aktrisa ýaş gahrymanyň, Ýuwaş umman adasynda ýaşaýan taýpanyň serdarynyň gyzynyň obrazyny janlandyrar.
“Men bu keşbi alandygyma örän begenýärin, Moana – meniň gowy görýän keşplerimiň biri. Meniň üçin Samoanyň we Ýuwaş umman sebitiniň beýleki halklarynyň adyndan çykyş etmek, ekranda maňa meňzeş gyzlary görkezmek uly hormat” – diýip, aktrisa belledi.
Şeýle-de, aktýorlar düzüminde Dueýn Jonson ýarymhudaý Mauiniň, täze zelandiýaly aktýorlar Jon Tui bilen Frenki Adams Moananyň kakasynyň we ejesiniň, Rina Ouen bolsa enesiniň keşbini ýerine ýetirer.
Filmiň surata düşürilişi 2024-nji ýylyň tomsunda başlar, premýera 2026-njy ýylyň 10-njy iýulyna meýilleşdirilýär.
