Gazagystanyň Baştutany Kasym-Žomart Tokaýew Madridiň “Atletiko” futbol klubunyň prezidenti Enrike Sereso Torres bilen duşuşdy. Olar ýurtda ispan klubunyň futbol akademiýasyny açmak meselesini maslahatlaşdylar diýip, Kazinform Akordanyň metbugat gullugyna salgylanyp habar berýär.
Tokaýew Gazagystanda futboly ösdürmegiň möhümdigini nygtap, Madridiň “Atletikosyna” öz tejribesi bilen paýlaşmaga taýýarlygy üçin minnetdarlygyny bildirdi. Gazagystanyň lideri geljekki akademiýany döretmegiň taslamasy bilen tanşyp, döwletiň futboly ösdürmäge gönükdirilen bu başlangyjy hemmetaraplaýyn goldamaga taýýardygyny aýtdy.
Respublikanyň Baştutanynyň belleýşi ýaly, ýurtda sportuň bu görnüşine aýratyn üns berilýär. Häzirki wagtda sport mekdeplerinde we seksiýalarynda 40 müňe golaý çaga meşgullanýar, infrastruktura kämilleşdirilýär, täze stadionlar gurulýar.
Sereso Torresiň aýtmagyna görä, Madridiň “Atletikosynyň” akademiýalary eýýäm dünýäniň köp ýurtlarynda hereket edip, ýaş futbolçylara we geljekki tälimçilere öňdebaryjy usulyýetleri we professional bilimi hödürleýär. Klubuň ýolbaşçysy Kasym-Žomart Tokaýewe Madrid toparynyň oýunçylarynyň awtograflary bolan köýnekçäni sowgat etdi.
Täze akademiýa Almaty welaýatynyň Talgar şäherindäki Akbulak Olimpiýa merkeziniň bazasynda ýerleşer.
Belläp geçsek, Madridiň “Atletikosy” Ispaniýanyň iň köp titula eýe bolan professional futbol klublarynyň biridir. Klub 1903-nji ýylyň 26-njy aprelinde esaslandyryldy.
