21-nji maýa geçilen gije Ýewropa ligasynyň final duşuşygy boldy we «Aston Willa» topary «Fraýburgy» utmagy başardy. Oýun Türkiýäniň Stambul şäherindäki «Tüpraş» stadionynda geçirildi.
Aýgytlaýjy duşuşyk 3:0 hasabynda tamamlandy. Gollary öz adyna Ýuri Tilemans (41-nji minut), Emiliano Buendiýa (45+3) we Morgan Rojers (58) ýazdy.
«Aston Willa» soňky gezek Ýewrokubok ýaryşlarynda baýragy 1982-nji ýylda alypdy — şol wagt klub Ýewropa çempionlarynyň kubogynyň (häzirki Çempionlar ligasy) finalynda «Bawariýany» 1:0 hasabynda utdy.
Şeýle-de, klub 2001-nji we 2008-nji ýyllarda Intertoto kubogyny gazanypdy. Bu ýaryş UEFA tarapyndan 1995-2008-nji ýyllar aralygynda Çempionlar ligasyna ýa-da UEFA kubogyna gatnaşmaga hukuk gazanyp bilmedik Ýewropa klublarynyň arasynda geçirilen tomusky futbol ýaryşydyr.
«Fraýburg» topary bolsa öz taryhynda ilkinji gezek Ýewrokubogyň finalynda oýnady. Mundan ozal bu toparyň iň ýokary görkezijisi 1/8 finala (2023 we 2024-nji ýyllarda) çykmak bolupdy.
«Aston Willanyň» baş tälimçisi Unai Emeri üçin Ýewropa ligasyndaky bu ýeňiş onuň karýerasyndaky bäşinji kubok bolup, onuň şahsy rekordyny täzeledi. Ol mundan ozal bu ýaryşda «Sewilýa» (2014, 2015, 2016) we «Wilýarreal» bilen (2021) ýeňiji bolupdy. 2019-njy ýylda bolsa Londonyň «Arsenal» topary bilen finala çykyp, «Çelsiden» utuldy.
Ýewrokuboklarda gazanylan umumy kuboklaryň sany boýunça tälimçileriň arasynda rekord eýesi italýan hünärmeni Karlo Ançelottidir (11 ýeňiş, olaryň arasynda 5-isi Çempionlar ligasynda).
Ýewropa ligasynyň final duşuşygyna «Aston Willanyň» köpden bäri janköýeri bolan Britaniýa tagtynyň mirasdüşeri şazada Uilýam hem gatnaşdy. Ýeňişden soň ol begenç gözýaşlaryny saklap bilmedi.
«Football Meets Data» portalynyň hasaplamalaryna görä, finalyň öňüsyrasynda «Aston Willa» bu möwsümde 42 million ýewro, «Fraýburg» bolsa 39,6 million ýewro pul baýragyny gazandy. Ýewropa ligasynyň ýenijisi bolandygy üçin Angliýanyň kluby goşmaça 6 million ýewro alar.
«Aston Willanyň» bu ýeňşi netijesinde geljek möwsümde Çempionlar ligasynda birbada alty iňlis kluby oýnap biler. Munuň üçin Emeriniň toparyna Premýer ligany (APL) bäşinji orunda tamamlamak ýeterlik. Çempionatyň tamamlanmagyna bir tapgyr galanda «Aston Willa» dördünji orunda barýar we «Liwerpuldan» üç utuk öňde dur.
Bellemeli ýeri, APL-de bäşinji ýeri eýelän topar Angliýanyň klublarynyň Ýewrokuboklardaky üstünlikli çykyşlary üçin berilýän goşmaça kwota esasynda ÇL-de orun alýar. Ýewropa ligasynyň ýeňijisi bolsa Çempionlar ligasynyň esasy tapgyryna gönüden-göni gatnaşmaga hukuk kazanýar. Şonuň üçin, eger-de «Aston Willa» çempionaty 5-nji ýerde tamamlasa, onda ÇL-e gatnaşmak hukugy goşmaça APL-de 6-njy ýeri eýelän topara berler.
