Ilon Mask Apple kompaniýasynyň iOS we macOS-a girizilen täze Apple Intelligence emeli aň funksiýalaryny tankytlap çykyş etdi. Milliarder sistemanyň “yzarlaýjylyk” mümkinçiliklerinden howatyrlanýandygyny we özüniň Tesla, SpaceX we X ýaly kompaniýalarynda iPhone-yň we beýleki Apple gurluşlarynyň ulanylmagyny gadagan edip biljekdigini aýtdy.
“Men muny islämok. Ýa-ha bu yzarlaýjy programma üpjünçiligini bes ediň, ýa-da ähli Apple gurluşlarynyň meniň kompaniýalarymyň çäklerinde ulanylmagy gadagan ediler” – diýip, telekeçi Tim Kukuň iOS-a täze sistemanyň girizilendigi baradaky habaryna teswir hökmünde X sosial ulgamynda ýazdy. Soňrak ol “kompaniýa gelýän adamlaryň öz Apple gurluşlaryny girelgede goýmaly boljakdygyny we olaryň signallary blokirlemek üçin Faradeý gözeneginde saklanjakdygyny” aýtdy.
Mask OpenAI-iň Apple-iň operasion sistemasyna girizilmegine nägilelik bildirip, munuň kompaniýanyň öz howpsuzlyk ýörelgelerini bozýandygyny aýtdy.
Ýatlap geçsek, kupertinoly kompaniýa 10-njy iýunda WWDC 2024 konferensiýasynda öz operasion sistemalarynda täze Apple Intelligence emeli aň funksiýalarynyň peýda bolandygyny habar berdi.
