Ýewropada Howpsuzlyk we Hyzmatdaşlyk Guramasy gaýtadan dikeldilýän energetika boýunça talyp hakly magistr maksatnamasyna ikinji ýazylyşygy yglan etdi. Maksatnama Merkezi Aziýadan, Owganystandan we Mongoliýadan aýal-gyzlar gatnaşyp biler diýip, “Türkmenistan: Altyn asyr” elektron neşiri ýazýar.
Maksatnama ýaş aýal-gyzlara durnukly ösüş üçin möhüm bolan gaýtadan dikeldilýän energetika pudagynda bilim almaga mümkinçilik berýär.
Awstriýanyň, Fransiýanyň, Germaniýanyň, Italiýanyň, Norwegiýanyň we Polşanyň hökümetleri tarapyndan goldanýan bu talyp hakly maksatnama doly tölegli okuw, ýaşaýyş jaýy, transport we aýlyk talyp hakyny hödürleýär. Maksatnama 2024-nji ýylyň 2-nji sentýabryndan 2025-nji ýylyň 31-nji maýyna çenli Nemes-Gazak uniwersitetinde geçiriler.
Gatnaşyjylar gaýtadan dikeldilýän energiýa çeşmelerini we energiýa netijeliligini strategiki dolandyryş boýunça hemmetaraplaýyn bilim alarlar, bu hem halkara we milli kompaniýalarda köp sanly karýera mümkinçiliklerine ýol açar.
Akademiki okuwdan başga-da, maksatnama terbiýeçilik goldawyny, gaýtadan dikeldilýän energetika desgalaryna baryp görmegi we professional gatnaşyklar toruny gurmak mümkinçiligini öz içine alýar.
Arzalar 2024-nji ýylyň 1-nji iýulyna çenli kabul edilýär. Maksatnama barada doly maglumat ÝHHG-niň saýtynda ýerleşdirilen. Gatnaşyjylaryň hasaba alynmagy we goşmaça maglumatlar Nemes-Gazak uniwersitetiniň saýtynda elýeterlidir.
Habarlaşmak üçin: Alekseý Kobzew (kobzev@dku.kz); Sanýa Ahmetowa (akhmetova@dku.kz); Abylaýhan Soltanaýew (soltanayev@dku.kz).
