Singapuryň Nanýan tehnologiýa uniwersitetiniň alymlary adamyň gözýaşyndan zarýad alyp bilýän özboluşly batareýany döretdiler. Bu tehnologiýa “Missiýany ýerine ýetirmek mümkin däl: Fantom protokoly” filminde gahrymanlaryň ýüz keşpleri tanamak we gözüň hereketini yzarlamak üçin akylly galtaşykly linzalary ulanýandygyny görkezýän sahna bilen ruhlandy diýip, CNBC ýazýar.
Ýogynlygy bary-ýogy 0,2 mm, adam saçyndan, takmynan, iki esse inçe bolan kiçijik batareýa hemişe göz bilen galtaşykda bolýan akylly linzalar üçin niýetlenendir. Ol gözýaşda saklanýan glýukozadan “iýmitlenýär” we glýukozany siňdirýän ýörite material bilen örtülendir. Adam näçe köp aglasa, akylly linza şonça-da köp işlär.
Ýöne aglamak hökman däl – batareýa bio-ylalaşykly duzly erginiň kömegi bilen zarýad berip bolar. Eger batareýany ergine salsaň, glýukoza natriý we hlorid ionlary bilen reaksiýa girer, bu hem zarýady köpelder. Sekiz sagatlyk himiki zarýad 80% sygymy üpjün etmek üçin ýeterlikdir, bu bolsa linzany birnäçe sagat ulanmak üçin ýeter.
Häzirki wagtda akkumulýatoryň sygymy we naprýaženiýasy pes, ýöne alymlar olary artdyrmagyň üstünde işleýärler. Bazara çykandan soň, batareýanyň bahasy bary-ýogy birnäçe dollar bolar.
Bu işläp taýýarlama diňe bir görüşi gowulandyrmak üçin däl, eýsem, keselleri anyklamak we saglyk ýagdaýyna gözegçilik etmek üçin ulanylyp bilinjek akylly galtaşykly linzalary döretmäge tarap möhüm ädimdir.
