31-nji maýda Mary şäherinden umumy uzynlygy 335 kilometre deň bolan weloýöriş badalga aldy. Oňa Türkmenistanyň Ahal, Daşoguz we Lebap welaýatlaryna hem-de Aşgabada wekilçilik edýän türgenleriň 53-si, tälimçileriň 7-si we welosipedlere serenjam berýän hünärmenleriň 2-si gatnaşýar.
Weloýöriş Aşgabat — Türkmenabat ýokary tizlikli awtomobil ýolunyň ulanmaga berlen Aşgabat — Mary böleginde geçirilýär. Ýöriş dört tapgyrdan ybarat bolar.
31-nji maýda ir säherde başlanan ýörişiň ilkinji gününde onuň iň uzyn tapgyry — 131 kilometr aralygy geçildi. Bu tapgyr günortanlar Babadaýhan etrabynyň çägindäki 239 belgili ýangyç guýujy bekediň awtoduralgasynda tamamlandy.
1-nji iýunda ýöriş ilkinji düşelgeden ýokary tizlikli awtomobil ýolunyň ugrundaky «Kerwensaraý» söwda we dynç alyş merkezine çenli bolan ikinji tapgyr bilen dowam etdi. Bu tapgyryň uzynlygy 104 kilometre ýetýär.
2-nji iýunda bolsa olar bu ýerden Ak bugdaý etrabynyň Änew şäherindäki sport mekdebine çenli meýilleşdirilen üçünji tapgyrda welosiped sürdüler. Ýoluň bu böleginiň uzynlygy 75 kilometrdir.
Ýöriş 3-nji iýun güni şol sport mekdebinden Aşgabatdaky «Welosiped» binasyna çenli 25 kilometrlik menzil bilen tamamlanar. Bu ýerden bolsa olar Bütindünýä welosiped güni mynasybetli Aşgabatda geçiriljek köpçülikleýin ýörişiň kerwenine goşularlar.
