Emeli aň pudagynda OpenAI täjirçilik däl barlag kompaniýasynyň egindeş esaslandyryjysy we baş müdiri Sem Altman “Peşgeş kasamyna” gol çekdi. Bu onuň ömrüniň dowamynda ýa-da ölenden soň baýlygynyň ep-esli bölegini haýyr-sahawata bermäge borçlanýandygyny aňladýar diýip, Finam portaly ýazýar.
Şeýlelikde, Altman bu borçnama gol çeken Bill Geýts, Uorren Baffet, Mark Sukerberg, Ilon Mask we Dewid Rokfeller ýaly beýleki birnäçe milliarderiň hataryna goşuldy.
Bloomberg agentliginiň hasaby boýunça, Altmanyň baýlygy 2 mlrd dollardan geçýär we ol, esasan, onuň OpenAI-däki paýy bilen däl-de, beýleki tehnologiýa kompaniýalaryna maýa goýumlary bilen baglanyşyklydyr.
“Peşgeş kasamy” 2010-njy ýylda Geýts we Baffet tarapyndan öňe sürlen başlangyç bolup, dünýäniň iň baý adamlaryny öz baýlyklarynyň ep-esli bölegini haýyr-sahawat işlerine bagyş etmäge çagyrýar.
