Ozal akylly nauşnikleri öndüriji hökmünde belli bolan, häzir bolsa audiogajetler üçin platformalary işläp düzýän Bragi nemes kompaniýasy OpenAI bilen hyzmatdaşlyk barada yglan etdi.
Bilelikdäki taslama ChatAI adyny aldy – bu GPT 4.1 modeliniň esasynda işleýän we gönüden-göni nauşniklere birleşdirip boljak ses kömekçisidir. Ol düwmäni basmak ýa-da açar sözi arkaly işläp başlaýar we smartfon, ekran bolmazdan hakyky wagtda jogap berýär.
Ulgam eýýäm Bose ýaly brendler we Bragi platformasyny ulanýan beýleki öndürijiler bilen gabat gelýär. ChatAI-iň aýratynlygy diňe bir soraglara jogap bermek däl-de, eýsem kontekste düşünmekdir: programma ulanyjynyň sesini tanaýar, daş-töwerekdäki gürrüňleri filtrleýär. Ýüzlenme oturdylan model tarapyndan işlenýär, soňra OpenAI-e iberilýär, alnan jogap hem göni nauşnik arkaly ýaňlanýar.
Bragi ulanyjy maglumatlarynyň serwerde ýa-da programmada saklanman, doly näbelliligi we howpsuzlygy üpjün edýändigini belleýär.
Platforma bellik etmek, terjime, maglumat bermek ýaly adaty funksiýalary hödürleýär. Öndürijiler ChatAI-iň esasynda öz ses funksiýalaryny döredip biler. Mysal üçin, nauşnikler sesi ulanyjynyň ýöreýşine, stiline ýa-da şähdine görä awtomatik sazlap biler.
Bragi tarapyndan geçirilen pikir soraşma ulanyjylaryň 89%-iniň EA-ly nauşnikler üçin, takmynan, 25 dollar artyk tölemäge taýýardygyny görkezdi. Eger nauşnikler goşmaça intellektual mümkinçiliklere eýe bolsa, bu gurluşlaryň ortaça bahasyny 135-160 dollara çenli artdyryp biler.
ChatAI-iň ilkinji relizi tomsa meýilleşdirilýär, ýöne ses kömekçisini gurnamak barada gutarnykly çözgüdi her bir öndüriji aýratynlykda kabul edýär.
