1-nji iýunda bellenilýän Çagalary goramagyň halkara güni mynasybetli Aşgabatda köp sanly gyzykly çäreler meýilleşdirilýär.
1-nji iýun:
- 15:00 – Türkmenistanyň Döwlet medeniýet merkeziniň Mukamlar köşgünde Ýaşlar simfoniki orkestriniň we “Bagtyýarlyk owazlary” çagalar horunyň baýramçylyk konserti geçiriler. Programma ýaş zehinleriň ýerine ýetirmeginde türkmen we daşary ýurt kompozitorlarynyň meşhur eserlerini öz içine alýar.
- 15:00 – “Watan” kinokonsert merkezi “Ýeňme” jemgyýetçilik guramasy tarapyndan gurnalan “Çagalyk planetasy” atly inklýuziw festiwala çagyrýar. Myhmanlara ýurduň dürli künjeginden zehinli çagalaryň çykyşlary garaşýar. Giriş mugt.
2-nji iýun:
- 10:00-dan 14:00-a çenli: Aşgabadyň “Älem” medeni-dynç alyş merkezinde Türkmenistanyň Magtymguly adyndaky Ýaşlar guramasynyň Çagalar gaznasynyň goldaw bermeginde “Agama” kluby tarapyndan geçirilýän “Çagalar gaýa festiwaly” bolar. 5 ýaşdan 13 ýaşa çenli çagalar gaýa dyrmaşmak boýunça öz güýçlerini synap bilerler. +99365811355 telefon belgisi boýunça deslapky arza hökmanydyr. Gatnaşyjylardan özleri bilen dogluş şahadatnamasyny (nusgasy), sport eşigini, arassa aýakgaby getirmek soralýar.
- Bütin gün: “Türkmen ertekileri dünýäsi” medeni-dynç alyş merkezi çagalary we ýetginjekleri attraksionly, otluly, batutly, karuselli, kartingli täzelenen oýun meýdançalaryna çagyrýar.
Mundan başga-da, şäheriň seýilgählerinde we konsert zallarynda dürli çykyşlar, bäsleşikler we oýunlar geçiriler.
Öň, biz Çagalary goramagyň halkara gününe bagyşlap, köp sanly gyzykly çykyşlary hödürleýän paýtagtyň sirkiniň, teatrlarynyň we kinoteatrlarynyň afişasyny hödürläpdik.
