28-nji iýunda Eýranda nobatdan daşary prezident saýlawlary geçiriler. Bu barada eýran habar beriş serişdeleri Yslam Respublikasynyň saýlaw toparynyň metbugat sekretary Mohsen Eslaminiň beýanatyna salgylanyp habar berýär.
Dalaşgärleri bellige almaklyk 30-njy maýdan 3-nji iýun aralygynda geçer. Saýlawdan öňki wagyz-nesihat döwri 12-nji iýundan 27-nji iýunyň irdenine çenli dowam eder.
Ýatlap geçsek, 19-njy maýda Eýranyň Prezidenti Ebrahim Raisiniň dikuçary ýurduň demirgazyk-günbatarynda dag gerişlerinde heläkçilige uçrady. Dikuçardakylaryň ählisi, şol sanda ýurduň Prezidenti, DIM-niň ýolbaşçysy Hoseýn Amir Abdollahian, Gündogar Azerbaýjan welaýatynyň gubernatory Malek Rahmati we aýatolla Mohammad Ali al-e-Haşem aradan çykdy.
Merhumlary jaýlamak çäresi maý aýynyň 23-ine bellenildi. Eýranda bäş günlük matam yglan edildi.
Türkmenistanyň Prezidenti we Halk Maslahatynyň Başlygy bolup geçen pajygaly waka sebäpli Eýranyň ýolbaşçylygyna gynanç bildirdiler.
20-nji maýda Eýranyň beýik ruhy lideri Aýatolla Ali Hamenei ýurduň prezidentiniň wezipesini wagtlaýyn birinji wise-prezident Mohammad Mohberiň ýerine ýetirjekdigini yglan etdi.
Eýranyň Ýaragly Güýçleriniň Baş ştabynyň başlygy Mohammad Bageri dikuçaryň heläkçilige uçramagynyň sebäplerini derňäp başlamagy tabşyrdy.
