Eýranyň mejlisi milli walýutanyň denominasiýasy baradaky kanunyň taslamasyna sereder. Rialdan dört noly aýyrmak meýilleşdirilýär, walýutanyň ady öňküligine galar. Şondan soň täze bir riallyk köne 10 000 bilen deň bolar.
Ownuk şaýy - geran dolanyşyga giriziler we 1 täze rial 100 gerana deň bolar.
Financial Times gazetiniň habar bermegine görä, mejlisiň ykdysady komiteti resminamanyň esasy düzgünlerini eýýäm tassyklady. Inisiatorlar reformanyň hasaplamalary ýönekeýleşdirer, buhgalteriýanyň ýüküni ýeňleder we nagt pullary çykarmagyň çykdajylaryny azaldar diýip umyt edýärler.
Denominasiýany geçirmegiň zerurlygy rialyň hümmetiniň uzak wagtlap düşmegi bilen düşündirilýär. Onuň hümmetine halkara sanksiýalary, nebitiň eksportyna girizilen çäklendirmeler we daşary ýurt maýa goýumlarynyň azalmagy täsir etdi. Üstümizdäki ýylyň iýun aýynda Ýakyn Gündogarda ýagdaýyň agyrlaşmagy goşmaça basyş boldy, şondan soň rial ýene-de birden arzanlady.
Mejlisde tassyklanylandan soň, kanunyň taslamasy ýurduň konstitusiýasyna laýyk gelýändigini-gelmeýändigini gözegçilikde saklaýan Goragçylar Geňeşi tarapyndan tassyklanmalydyr.
Şol bir wagtyň özünde, ykdysatçylar denominasiýanyň simwoliki boljakdygyny bellediler. Nollaryň aýrylmagy pul-karz syýasatynyň guraly hasaplanmaýar we hümmetsizlenmäni saklamaga ukyply däldir - bu diňe buhgalteriýa çäresi bolup durýar.
Geçen ýylyň 21-nji iýunynda Eýranyň Merkezi Bankynyň sanly rialy halk köpçüligine hödürländigini bellemelidiris. Raýatlar ony QR kodlar arkaly tölegleri etmek we geçirimler üçin ulanmaga mümkinçilik aldylar. Sanly walýutanyň pilot synagy 2022-nji ýylyň sentýabr aýynda geçirildi.
