Türkmenistanyň Daşary işler ministrligi Eýranyň Prezidentiniň dikuçarynyň "kynçylykly gonmagy" bilen bagly gözleg işlerine ýardam bermäge taýýarlygy barada beýanat çykardy.
Degişli beýanat Türkmenistanyň DIM-niň resmi saýtynda ýerleşdirildi.
"Türkmenistan Eýrana Gündogar Azerbaýjan welaýatynda dikuçaryň «kynçylykly gonmagy» sebäpli zerur bolan kömegi bermäge taýýar" diýlip, beýanatda aýdylýar.
Türkmenistan bortunda Prezident Ebrahim Raisi we beýleki ýokary wezipeli resmi adamlar bolan dikuçaryň Eýranda "kynçylykly gonmagy" bilen bagly habary çuňňur aladalanma bilen kabul etdi.
Türkmenistan goňşy döwletiň doganlyk halkyna zerur bolan ähli kömegi bermäge taýýar.
Türkmen tarapy ýagdaýlary üns bilen yzarlaýar we Yslam Respublikasynyň diplomatik gullugy bilen yzygiderli aragatnaşyk saklaýar" - diýlip, Türkmenistanyň DIM-i habar berýär.
19-njy maýda bortunda Ebrahim Raisi bolan dikuçar kynçylykly gonuş etdi. Mälim bolmagyna görä, Eýranyň Prezidenti Azerbaýjandan dolanyp gelýän eken. Azerbaýjanda ol eýran-azerbaýjan serhedinde Aras derýasynda bendiň açylyşyna gatnaşypdyr.
Prezidentiň dikuçar kerweninde üç sany dikuçar bolupdyr. Tasnim gullugynyň habar bermegine görä, beýleki iki dikuçarda energetika ministri we ýol we şäher gurluşyk ministrleri bolupdyr. Beýleki iki dikuçar barmaly nokadyna üstünlikli barypdyr.
20-nji maýda irden Prezidentiň dikuçarynyň tapylandygy habar berildi. Bu barada 5:45-de (Aşgabat wagty bilen 7:15-de) Press TV teleýaýlymynyň Telegram-kanalynda Eýranyň Gyzylýarym Aý jemgyýetine salgylanyp habar berildi. Dikuçaryň tapylandygyny Eýranyň ýaragly güýçleriniň ýörite bölümi hem tassyklady.
«Halas ediş toparlary Prezident Raisiniň dikuçaryny tanamagy başardylar, ähli güýçler şol ýere gönükdirildi" - diýlip, guramanyň habarynda aýdylýar.
Ýurduň içeri işler ministri "kynçylykly gonuşyň" duman we ýaramaz howa şertleri sebäpli bolandygyny habar berdi. Howa gämisiniň gözleg işlerini azyndan 40 topar alyp barýar.
