Haýyr-sahawatçy Melinda Frenç Geýts Bill we Melinda Geýts Foundation gaznasynyň egindeş başlygy wezipesinden gidýändigini habar berdi.
“Pugta ölçerip-döküp, pikirlenenimden soň, Bill we Melinda Geýts Gaznasynyň egindeş başlygy wezipesinden gitmek kararyna geldim. Gaznada iň soňky iş günüm 7-nji iýun bolar" - diýip, Melinda Geýts 13-nji maýda X (öňki Twitter) sosial ulgamynda habar berdi.
Öňki adamsy, Microsoft-yň esaslandyryjysy Bill Geýts bilen baglaşylan şertnama laýyklykda Melinda gaznadan çykandan soň ABŞ-da we dünýäde “aýallaryň we maşgalalaryň bähbidine” haýyr-sahawat maksatlary üçin 12,5 milliard dollar alar.
Öňki aýalynyň gelen karary barada teswir bermek bilen, Bill Geýts gaznanyň işine goşan goşandy üçin oňa minnetdarlyk bildirdi.
"Melindanyň gidýändigine gynanýaryn, ýöne özüniň geljekki haýyr-sahawat işine uly täsir etjekdigine ynanýaryn" – diýip, ol X sosial ulgamynda ýazdy we özüniň “gaznanyň işine doly yhlasly bolup galýandygyny” sözüniň üstüne goşdy.
Bil Geýts bilen Melinda Frenç 1994-nji ýylda durmuş gurupdylar. Olaryň üç çagasy bar. 2021-nji ýylda är-aýal aýrylyşýandyklaryny mälim etdiler.
Bil we Melinda Geýts gaznasy iň uly hususy we dünýäde iň täsirli gaznalaryň biri. Ol 2000-nji ýylda esaslandyryldy. 2022-nji ýylyň maglumatyna görä, bu gaznanyň takmynan 69 milliard dollary bar. Gazna ösüp barýan ýurtlarda howply kesellere garşy göreşmeklige, ABŞ-da saglyk we bilim maksatnamalaryna gönükdirilendir. Şeýle hem bu gurama COVID-19 sanjymyny döretmek we pandemiýa döwründe ilatyň iň ejiz gatlaklaryna goldaw bermek üçin ýüzlerçe million dollar bölüp beripdi.
