Awstraliýaly režissýor Piter Uir 81-nji Wenesiýa film festiwalynda abraýly “Altyn ýolbars” baýragyny alar. Bu barada abraýly film festiwalynyň resmi web sahypasyna salgylanýan Variety habar berýär.
Kinematografiýa goşan goşantlaryny ykrar edýän bu abraýly baýrak 40 ýylda bary-ýogy 13 filmi surata düşüren, ýöne häzirki zaman kinosynyň beýik ussatlarynyň arasynda öz ornuny berkiden 79 ýaşly režissýoryň hyzmatlarynyň nobatdaky ykrar edilmesidir.
Karýerasyna 1970-nji ýyllaryň ahyrynda başlan Uir Awstraliýa kinosynyň galkynyşynda möhüm rol oýnady. Ol hekaýat etmekde ussatlygy we dogabitdi romantizmi bilen meşhurlyk bolup, Golliwudda özboluşlylygyny we garaşsyzlygyny ýitirmän üstünlik gazandy. Onuň Jim Kerriniň oýnamagynda “Trumanyň şüweleňi” (“Шоу Трумана”), Robin Uilliamsyň oýnamagynda “Öli şahyrlaryň jemgyýeti” (“Общество мёртвых поэтов”), Rassel Krouwyň oýnamagynda “Deňizleriň hojaýyny: Ýeriň aýagujunda” (“Хозяин морей: На краю Земли”) we Kolin Farrelliň oýnamagynda “Öýe barýan ýolda” (“Путь домой”) filmleri uly üstünlik gazandy.
2023-nji ýylda eýýäm Uir kinematografiýada bitiren hyzmatlary üçin hormatly “Oskar” bilen sylaglandy. Wenesiýa film festiwalynda “Altyn ýolbars” baýragyny almagy, onuň dünýä kino pudagyna ýetiren ägirt uly täsirini tassyklaýar.
Wenesiýa film festiwaly 28-nji awgustdan 7-nji sentýabr aralygynda geçiriler.
