Türkmenistan dizel ýangyjynyň arzanlygy boýunça Merkezi Aziýada öňdeligi eýeleýär. Muňa Global Petrol Prices (GPP) portalynyň maglumatlary şaýatlyk edýär.
2024-nji ýylyň 6-njy maýyndaky ýagdaýa görä, Türkmenistanda dizel ýangyjynyň bir litriniň bahasy 0,28 dollar. Bu görkeziji bilen Türkmenistan nebit önümleriniň şu görnüşiniň iň arzan ýurtlarynyň sanawynda dünýäde ýedinji orunda ýerleşýär.
Sebitde dizel ýangyjynyň arzanlygy boýunça ikinji orunda Gazagystan ýerleşýär (1 litr - 0,66 dollar). Ondan soňra Gyrgyzystan (0,82 dollar) we Özbegistan (0,97 dollar) gelýär.
Dünýä boýunça dizel ýangyjynyň iň arzan ýurtlarynyň ilkinji üçlügine Wenesuela (resmi kurs boýunça 1 litriniň bahasy 0,004 dollar), Eýran (0,006 dollar) we Liwiýa (0,031 dollar) girýär. Iň gymmat dizel ýangyjy Gonkongda satylýar (3,05 dollar).
