Emeli aň Finlýandiýadaky üçünji iň iri kofe öndüriji bolan «Kaffa Roastery» üçin täze kofe garyndysyny döretdi. Neýroulgamyň döreden garyndysyna AI-conic diýlip at goýuldy.
Garyndy ChatGPT-ä we Copilot-a meňzeş ösen modelleriň kömegi bilen işlenip düzüldi. Olaryň wezipesi kofe muşdaklarynyň isleglerini doly kanagatlandyrjak, ýöne şol bir wagtyň özünde, adaty usullaryň daşyna çykmaga mümkinçilik berýän garyndy döretmekdi.
Emeli aň Braziliýadan, Kolumbiýadan, Efiopiýadan we Gwatemaladan dört görnüşli kofe noýbasyny saýlady. Esas hökmünde Braziliýadan ýumşak tagamly «fazenda Pinal» görnüşi alyndy.
Mundan başga-da, neýroulgam gaplama belligini we önümiň beýanyny hem döretdi. Onda AI-conic kofesiniň «süýjülik bilen ýetişen miweleriň deňagramly garyndysydygy» aýdylýar.
«Kaffa» kompaniýasynyň işgärleri emeli aňyň tagallalaryna ýokary baha berdiler. Hünärmenler kofe dänelerini gowurmak boýunça ilkinji synagdan we tagam synagyndan soň, «tehnologik garyndynyň ajaýypdygyny» we adamlaryň gatyşmagyny talap etmeýändigini bellediler.
Mundan öň, fin alymlary adaty kofe dänelerini talap etmeýän innowasion kofe görnüşini döretdiler. Içgi laboratoriýada kofe agajynyň öýjüklerinden alynýar we gowurmak üçin lazer şöhleleri ulanylýar. Hünärmenler bu kofeniň içginiň nusgawy görnüşiniň tagamyna 80% meňzeýändigini aýdýarlar.
