Düýn Aşgabatda hokkeý boýunça halkara ýaryşyň toparlaýyn tapgyry tamamlandy we netijede medallar ugrunda bäsleşjek toparlar belli boldy.
Final oýnunda “A” toparçanyň lideri Türkmenistanyň “Galkan” kluby bilen “B” toparçanyň ýeňijisi RF-iň Tatarstan Respublikasyndan “ADIHIC-Kazan” duşuşýar.
Bürünç baýrak üçin “Feniks” (Özbegistan) we “Volat” (Belarus) göreşýär.
“Feniks” “A” toparçada Eýranyň “Ice Box Iran Mall” toparyny 6:1 hasabynda utup, ikinji orny eýeledi. “Volat” “B” toparçada “Dordoi-den” (Gyrgyzystan) 2:1 hasabynda üstün çykyp, ikinji boldy.
6 utuk gazanan Gazagystanyň “Aqmola” klubunda hem bürünç medal ugrunda oýnamak mümkinçiligi bardy, ýöne ol jemleýji tapgyrda “ADIHIC-Kazan-y” utmalydy. Emma Kazanyň topary 6:1 hasabynda utup, iň ýokary 12 utugy gazandy.
Beýleki bir oýunda Omandan “Oman Nationals” topary Bahreýnden “Bahrain Ice Hockey Club-y” 3:2 hasabynda utdy.
Ýatlap geçsek, Aşgabatda hokkeý boýunça halkara ýaryş 15-nji aprelde başlady.
