“Time” žurnaly 2024-nji ýylyň iň abraýly 100 adamynyň sanawyny hödürledi. Sanaw diýseň özboluşly boldy. Oňa kino, aýdym-saz, sport, žurnalistika, aktiwizm ýaly dürli ugruň wekilleri goşuldy.
Kino işgärleriniň arasyndan sanawa ýaponiýaly multiplikator Haýao Miýadzaki, asly hindistanly britaniýaly aktýor Dew Patel (“Harabalykdan çykan millioner”), amerikaly kinorežissýor Sofiýa Koppola, hindistanly aktrisa we aýdymçy Aliýa Bhatt, amerikaly aktýor Kolman Domingo we kanada-amerikaly aktýor Maýkl Jeý Foks girdi.
Sazandalardan sanawa britaniýaly aýdymçy, asly kosowaly Dua Lipa, awstraliýaly aýdymçy Kaýli Minoug, amerikaly repçi 21 Savage we nigeriýaly sazanda Burna Boy goşuldy.
Sport dünýäsinden sanawda “Red Bulluň” niderlandly sürüjisi Maks Werstappen, ispaniýaly futbolçy Jennifer Ermoso we beýlekiler bellenildi.
Sanawa palestinaly fotožurnalist Motaz Azaýzanyň goşulandygyna-da ünsi çekmek gerek.
Şeýle-de, sanawda Microsoft-yň ýolbaşçysy Satýa Nadella, Hytaýyň BYD kompaniýasynyň prezidenti Wan Çuanfu we Nvidia-nyň ýolbaşçysy Jensen Huang bar.
