Skytrax gözleg kompaniýasy ýolagçylaryň seslenmelerine esaslanyp, dünýäniň iň gowy howa menzilleriniň ýyllyk reýtingini hödürledi. Şu ýyl iň gowusy Dohadaky Hamad halkara howa menzili boldy.
Meýdany 22 inedördül kilometr bolan ägirt toplumda syýahatçylaryň rahatlygy üçin ähli zerur zatlar: tropiki ösümlikleriň uly bakjasy, basseýnli fitnes merkezi, mugt çäksiz Wi-Fi we hatda dindarlar üçin birnäçe zallar bar.
Reýtingiň ikinji ornuna geçen ýyl sanawyň lideri bolan Singapurdaky Çangi howa menzili düşdi. Iň gowy howa menzilleriniň üçlügini Seuldaky Inçhon jemledi.
Şeýle-de, ilkinji onluga Tokiodaky Haneda we Narita howa menzilleri, Parižiň Şarl-de-Goll howa menzili, Dubaýyň howa menzili, Mýunheniň Frans-Ýozef Ştraus adyndaky howa menzili, Sýurihiň we Stambulyň howa menzilleri girdi.
