“PLOS One” žurnalynda neşir edilen täze ylmy gözlege görä, ösen emeli aň modelleri hakykatda eýe bolan derejesinden has pes aň derejesini “ýasap”, aldawly hereketi görkezip bilerler.
Gumboldt adyndaky Berlin uniwersitetiniň we Pragadaky Karlow uniwersitetiniň ylmy gözlegçileri uly dil modelini (LLM) aň nazaryýetiniň ölçegleri boýunça synagdan geçirdiler. Emeli aň synagynyň çäklerinde soraglara jogap berip, 1-den 6 ýaş aralygyndaky çagalaryň özüni alyp barşyna “öýkünmek” wezipesi goýuldy. 1000-den gowrak synagy geçip, modeller hakyky çagalaryňky bilen meňzeş kognitiw ösüşi, şeýle-de öz netijelerini bilkastlaýyn peseltmek ukybyny görkezdiler.
Bu açyş, emeli aňyň çalt ösmegini dowam etdirýändigi sebäpli, geljekde olaryň şeýle hereketleriniň potensial netijeleri barada pikirlenmäge sebäp döredýär.
“PsyPost” neşiri bilen söhbetdeşlikde gözlegiň awtory Anna Maklowa bu açyşlaryň adam ýaly pikirlenmäge we hereket etmäge ukyply umumy emeli aňyň (AGI) ösüşinde uly ähmiýete eýe bolup biljekdigini belledi.
