“Fulhemiň” braziliýaly hüjümçisi Rodrigo Munis mart aýynda Angliýanyň premýer-ligasynyň iň gowy futbolçysy saýlandy diýlip, ýaryşyň web sahypasynda habar berilýär.
Geçen aý braziliýaly hüjümçi dört duşuşykda oýnady, dört gol saldy we bir ýardam pasyny berdi. 29-njy tapgyrda “Tottenhem” bilen oýunda (3:0) dubl etdi.
Baýrak ugrunda şwesiýaly Aleksandr Isak (“Nýukasl”), argentinaly Aleksis Makallister (“Liwerpul”), angliýalylar Koul Palmer (“Çelsi”) we Ben Waýt (“Arsenal”), ganaly Antuan Semenýo (“Bornmut”), günorta koreýaly Son hyn Min (“Tottenhem”) bäsleşdi.
Aýyň iň gowy tälimçisi “Bornmuta” ýolbaşçylyk edýän Andoni Iraola boldy. Onuň ýolbaşçylygynda topar mart aýynda dört oýun oýnap, üç ýeňiş gazandy we iki gezek deňme-deň oýnady. Klub 41 utuk bilen 12-nji ýerde barýar.
Baýrak üçin Iraoladan başga-da, “Arsenalyň” tälimçisi Mikel Arteta, “Liwerpulyň” tälimçisi Ýurgen Klopp we “Tottenhemiň” baş tälimçisi Angelos Postekoglu dalaşgär görkezildi.
