Ak öý NASA agentligine Aý we beýleki asman jisimleri üçin bir umumy wagt ülňüsini döretmegi tabşyrdy. Bu barada Ak öýüň Ylmy-tehniki syýasat edarasynyň ýolbaşçysy Arati Prabhakaryň gulluk hatyna salgylanyp, Reuters agentligi habar berýär. Muny ixbt.com ýetirýär.
Resminama laýyklykda, Aýdaky adamlar üçin Ýeriň sagatlary bir gije-gündizde ortaça 58,7 mikrosekunt yza galar, Ýer wagty bilen başga-da tapawutlar bar. Şonuň üçin Aý wagtynyň bir umumy ülňüsi bolmazdan kosmos enjamlarynyň arasynda maglumatlary geçirmegiň howpsuzlygyny we Ýeriň, Aý hemralarynyň, bazalaryň we astronawtlaryň arasyndaky gatnaşyklaryň sinhronlaşdyrylmagyny üpjün etmek kyn bolar. Mundan başga-da, wagt taýdan tapawut kartalary düzmekde we Aýda ýa-da onuň orbitasynda ýerleşilýän ýeri kesgitlemekde ýalňyşlyklara getirip biler.
OSTP Aý wagtyny takyk kesgitlemek üçin Ýeriň tebigy hemrasynyň üstünde atom sagatlaryny guramagyň zerur boljakdygyny çaklaýar. Ahyrynda, bir wagt ülňüsi Aýda dürli amallary ýerine ýetirmekde möhüm ähmiýete eýe bolar.
2026-njy ýyla çenli ABŞ Aýa meýilleşdirilen astronawtly uçuşyň öňüsyrasynda sazlaşykly Aý wagtyny girizmegi meýilleşdirýär. “Artemida-3” missiýasy 1972-nji ýyldaky “Apollon-17” missiýasyndan bäri Aýyň üstüne astronawtlaryň ilkinji gonuşy bolar.
