Microsoft we OpenAI kompaniýalary 100 milliard dollarlyk, emeli aňly Stargate superkompýuterini döretmek üçin tagallalaryny birleşdirýärler. Bu barada taslama ýakyn üç çeşmä salgylanýan The Information neşiri habar berdi.
Superkompýuteriň görlüp-eşidilmedik hasaplaýyş güýjüne eýe boljakdygy we bar bolan maglumat işleýiş merkezlerine başartmaýan meseleleri çözmäge mümkinçilik berjekdigi habar berildi.
Stargate OpenAI-yň millionlarça ýöriteleşen çipleriniň esasynda işlär. Inženerler ulgamyň netijeliligini ýokarlandyrmak maksady bilen çipleri we sowadyş ulgamyny ýerleşdirmek üçin täze arhitekturany ösdürerler.
Microsoft bu taslamany maliýeleşdirer. Stargate 2028-nji ýylda goýberilip başlanar.
Muňa ugurdaşlykda Microsoft 2026-njy ýylda işe girizilmeli, OpenAI-a niýetlenen has kiçi dördünji faza superkompýuteriniň üstünde işleýär.
2024-nji ýylyň martynda Ilon Mask Microsoft bilen hyzmatdaşlygyň kompaniýanyň asylky täjirçilik däl wezipesine ters gelýändigini öňe sürüp, OpenAI-a we onuň baş direktory Sem Altmana garşy kazyýete arza beripdi.
OpenAI 2015-nji ýylda täjirçilik däl gözleg laboratoriýasy hökmünde döredilipdi. Ilon Mask onuň esaslandyryjylaryň biri, ýöne 2018-nji ýylda kompaniýany terk edipdi. Maskyň aklawçylary 2020-nji ýylyň ortalaryna çenli onuň işine gatnaşmagyny dowam edendigini öňe sürýärler.
