ABŞ-da iň uly hej-gaznalaryň biri bolan Bridgewater-iň esaslandyryjysy milliarder Reý Dalio kompaniýadaky soňky paýyny satyp, müdirler geňeşinden çykdy. Bu barada geçen hepdede hej-gaznanyň müşderilerine gönükdirilen hata salgylanyp, The Wall Street Journal habar berýär.
Kompaniýa Daliodan galan paýlaryny satyn aldy. Indi Bridgewater-iň iň uly eýeleriniň biri kompaniýanyň tas 20%-ine eýeçilik edýän Bruneýiň garaşsyz gaznasy boldy. Ýöne Bruneýiň maýa goýum agentligi (BIA) hatda gönüden-göni agzalmaýar. Çeşmäniň maglumatlaryna görä, maýa goýumlar boýunça direktorlaryň biri Bob Prins hem gaznada uly paýy saklaýar.
75 ýaşly Dalionyň aýtmagyna görä, ol Bridgewater gaznalaryna maýa goýmagyny dowam etdirer we “müşderi hem halypa” hökmünde kompaniýanyň işine gatnaşar.
Dalio “maýa goýumda Stiw Jobs” diýlip atlandyrylýar. Ol 16 mlrd dollar baýlygy bilen Bloomberg Billionaires Index reýtinginde 150-nji orny eýeleýär. Öň onuň kapitalynyň esasy bölegi 50 ýyl mundan ozal esaslandyran we dünýäde iň uly hej-gaznalaryň birine öwren Bridgewater kompaniýasyndaky paýy bilen baglanyşyklydy. 2022-nji ýylyň sentýabrynda ol hej-gaznanyň ýolbaşçysy wezipesinden gitdi.
Dalio “Ýörelgeler. Durmuş we iş” (Principles: Life and Work) we “Dünýä tertibini üýtgetmegiň ýörelgeleri” (Principles for Dealing with the Changing World Order) bestsellerleriniň awtory hökmünde-de bellidir.
