Şu gün, 26-njy martda Dünýä çempionaty – 2026-nyň saýlama tapgyrynyň “E” toparçasynda dördünji tapgyryň duşuşyklary geçirildi. Paýtagtymyzdaky “Aşgabat” köpugurly stadionynda geçirilen duşuşykda Türkmenistanyň hem-de Eýranyň milli ýygyndylary duşuşdylar.
Duşuşykda Eýranyň milli ýygyndy topary 1:0 hasabynda ýeňiş gazandy. Bu toparçanyň çäginde geçirilen beýleki duşuşykda Özbegistanyň milli ýygyndysy öz meýdanynda Hytaý Gonkongynyň ýygyndy toparyny uly hasap bilen (3:0) ýeňlişe sezewar etdi.
Şeýlelikde, geçirilen bu tapgyrdan soň Özbegistanyň hem-de Eýranyň milli ýygyndy toparlary 10 utukdan topladylar. Türkmenistanyň hem-de Hytaý Gonkongynyň ýygyndy toparlary 1 utukdan topladylar.
Bu toparçadaky bäşinji tapgyryň duşuşyklary 6-njy iýunda geçirilip, onda Türkmenistanyň ýygyndy topary myhmançylykda Özbegistanyň milli ýygyndysy bilen duşuşar. Hytaý Gonkongynyň milli ýygyndysy bolsa Eýranyň ýygyndy toparyny kabul eder.
