Russiýa Federasiýasynyň Merkezi Saýlaw Komissiýasynyň başlygy Ella Pamfilowa ýörite mejlisde ýurduň Prezident saýlawlarynda ses berişligiň resmi netijelerini jemledi. Bu barada RIA Nowosti habar berýär.
MSK-nyň maglumatlaryna görä, saýlawlarda RF-iň häzirki Baştutany Wladimir Putin saýlawçylaryň 87,28% sesini (76 277 708 adam) alyp, ynamly ýeňiş gazandy.
Ikinji saýlawçylaryň 4,31% sesi (3 768 470) bilen RFKP-den dalaşgär Nikolaý Haritonow boldy.
Üçünji 3,85% ses (3 362 484) bilen Wladislaw Dawankow (“Täze adamlar” partiýasy) boldy. Dalaşgärleriň arasyndan Leonid Sluskiý (RLDP) iň az ses aldy – 3,20% (2 797 629).
“Wladimir Wladimirowiç Putin Russiýa Federasiýasynyň Prezidenti saýlandy” – diýip, Pamfilowa ses berişligiň jemi boýunça teswirnama gol çekilenden soň aýtdy.
Saýlawlara gatnaşyk 77,49% boldy. Saýlawlara 87 576 075 saýlawçy gatnaşdy. Pamfilowa Russiýanyň häzirki zaman taryhynda şeýle görkezijiniň heniz bolmandygyny belledi.
Daşary ýurtlarda 388 791 saýlawçy ses berdi.
