Türkmenistanda halk hojalygynyň zerurlyklary üçin möhüm bolan elektrik energiýasyny toplaýjy we saklaýjy enjamlary öndürmäge ýöriteleşdirilen “Üznüksiz çeşme” hojalyk jemgyýetini döretmek meýilleşdirilýär.
Wise-premýer B.Annamämmedow anna güni geçirilen Hökümet mejlisinde bu barada döwlet Baştutanyna hasabat berdi.
Täze önümçilik Türkmenistanyň Energetika ministrliginiň “Türkmenenergo” döwlet elektroenergetika korporasiýasynyň “Aşgabatenergo” önümçilik birleşiginiň we “Üznüksiz hyzmat” hususy kärhanasynyň paýly gatnaşmaklarynda dörediler. Ol ýurdumyzyň senagatlaşdyrylmagyna goşant goşmaga, daşary ýurtlardan getirilýän elektrik energiýasyny toplaýjy we saklaýjy enjamlaryň möçberini azaltmaga, şeýle hem täze iş orunlaryny döretmäge mümkinçilik berer.
Serdar Berdimuhamedow elektrik energiýasyny toplaýjy we saklaýjy enjamlary ýurdumyzda öndürmek işini ýola goýmaga möhüm ähmiýet bermegiň wajypdygyny belläp, bu ugurda dörediljek bilelikdäki hojalyk jemgyýetiniň işinde häzirki zaman talaplaryndan ugur alynmalydygyny aýtdy we wise-premýere bu babatda anyk tabşyryklary berdi.
