12-nji martda türkmen wekiliýeti Awstriýanyň Federal ykdysady palatasynda bilelikdäki işewürlik duşuşyklaryny geçirdi.
Türkmen wekiliýetiniň Wena şäherine amala aşyran saparyna ýolbaşçylyk eden wise-premýer, Türkmenistanyň daşary işler ministri saparyň çäklerinde Awstriýanyň işewür toparlarynyň wekilleri bilen "tegelek stol" görnüşinde pikir alyşmalar geçirdi.
Amaly özara gatnaşyklara ünsi çekýän häzirki ara alyp maslahatlaşmalara başlamazdan ozal, Türkmenistanyň Daşary işler ministrliginiň, Söwda-senagat edarasynyň hem-de saglygy goraýyş ulgamynyň ýolbaşçylarynyň Awstriýanyň Federal ykdysady palatasynyň wise-prezidenti Filip Gadi bilen kiçi düzümde duşuşygy geçirildi. Soňra türkmen wekiliýetiniň beýleki agzalary we Awstriýanyň onlarça kompaniýasynyň wekilleri gepleşiklere goşuldy.
Giriş bölüminde Türkmenistanyň ykdysady kuwwatlyklary barada giňişleýin maglumat berildi.
Türkmenistanyň gaýtadan işleýän senagat önümleriniň eksportdaky paýyny artdyrmak bilen bir hatarda, energiýa eksportyny diwersifikasiýa etmek syýasatyny dowam etdirmegine awstriýaly hyzmatdaşlaryň ünsi çekildi. Uglewodorod eksportyndan alnan girdejiler ýurda goşmaça gymmaty bolan pudaklary ösdürmäge işjeň maýa goýmaga mümkinçilik berýär. 2023-nji ýylyň ahyrynda ykdysadyýete goýlan maýa goýumlar 11 milliard ABŞ dollaryndan gowrak boldy, bu 2022-nji ýyldakydan 7,8% ýokarydyr.
Maýa goýum we işewürlik gurşawyny gowulandyrmak bilen, Türkmenistan önümçilik kärhanalaryna göni maliýe maýa goýumlary görnüşinde daşary ýurt maýalaryny çekmek üçin şertleri döredýär. Soňky ýyllarda gaz himiýasy pudagynda şeýle maýa goýum taslamalarynyň ençemesi durmuşa geçirildi. Bular ammiak, karbamid, polipropilen, polietilen we sintetiki benzin öndürmek üçin gurlan täze kärhanalara degişlidir.
Awstriýanyň işewürligi barada aýdylanda bolsa, hyzmatdaşlygyň geljegi uly ugurlarynyň arasynda energiýa, ulag, oba hojalygy, sanlylaşdyrma, ýaşyl ykdysadyýet we beýlekiler görkezildi.
Awstriýanyň Federal ykdysady palatasy degişli ugurda işleri utgaşdyrmak bilen milli we halkara derejede Awstriýanyň işewür toparlarynyň bähbitlerine wekilçilik edýär. Ol dokuz federal ştatyň palatalaryny we ýurduň senagatyna wekilçilik edýän 110 söwda birleşigini özara birleşdirýär. Söwda palatasyna agza bolmak Awstriýanyň kompaniýalary üçin hökmany şertdir. Şonuň üçin hem palata ýurtda hereket edýän 430 müňe golaý kompaniýany özüne birleşdirýär.
