Türki Döwletleriň Guramasynyň (TDG) Aksakgallar geňeşiniň 15-nji mejlisiniň delegatlary Köpetdagyň eteginde ýerleşýän Ahalteke atçylyk toplumyna baryp gördüler. Bu barada Türkmenistan Halkara habarlar portaly habar berýär.
Saparyň dowamynda myhmanlar toplumyň infrastrukturasy, şol sanda administratiw we VIP binalar, açyk meýdança, atlary, taýçanaklary saklamak üçin athanalar bilen tanyşdylar.
Wekiliýetlere atlary suwa düşürmek üçin howuzlar, haýwanlaryň saglygyny we howpsuzlygyny üpjün etmek üçin zerur zatlar bilen üpjün edilen karantin binasy görkezildi. Ahalteke atçylyk toplumy döwrebap talaplara laýyk gelýär we atlary türgenleşdirmek hem ýaryşlara taýýarlamak üçin zerur zatlaryň ählisi bilen üpjün edilendir.
Türkmenistan ahalteke atçylygynyň ykrar edilen merkezi we bu özboluşly tohumyň watanydyr. Türkmenler tarapyndan, takmynan, 5000 ýyl mundan ozal ösdürilip ýetişdirilen ahalteke atlary häzire çenli çydamlylygy, tizligi we ajaýyp ýörişi bilen meşhurdyr. Köp ippolog alymlaryň pikiriçe, ahalteke atlarynyň gany atlaryň häzirki tohumlarynyň köpüsinde bar.
