Türkmenistanda Halkara zenanlar gününiň öňüsyrasynda ýurduň ösüşine uly goşant goşan aýal-gyzlar hormatlanýar. Uzak ýaşly aýallara aýratyn üns berilýär. Şeýle pähim-paýhasly aýallara “Türkmenistan” we “Neýtralnyý Türkmenistan” gazetinde ýörite materiallar bagyşlanýar.
Hojambaz etrabynyň Boroşly obasynda 97 ýaşly Akjagül Durdyýewa ýaşaýar. Ol aşpezlik işlerine, el işlerine, haly dokamaga we keçe basmaga ussat aýal bolup, 4 ogul we 3 gyz ulaltdy. Onuň 30 agtygy, 77 çowlugy we 8 ýuwlugy bar. Ol hem uruş döwrüniň kynçylyklaryny başdan geçirdi.
“Men kakamyň elinde ejesiz ýetim ulaldym. Uruş ýyllary örän kyn boldy. Haçan-da biziň obamyzdan erkekleriň ählisi fronta gidende, agyr zähmet aýallaryň gerdenine düşdi” diýip, Akjagül daýza gürrüň berýär.
Aýallar we çagalar haşar edýärdiler, gazy gazýardylar, işden soň ýarygijä çenli tikin edýärdiler, esgerler üçin ellik we jorap örýärdiler, haly dokaýardylar.
Şeýlelikde, häkimligiň, jemgyýetçilik guramalarynyň wekilleri we žurnalistler Ahal welaýatynyň Babadaýhan etrabynda ýaşaýan 95 ýaşly Hurmagözel Mawyýewany görüp gaýtdylar. Ol güýjüni gaýgyrman ömürboýy zähmet çeken aýal, hatda häzirem ýaşynyň bir çene barandygyna garamazdan, gujurly we şähdaçyk.
“Ol özüni şeýle bir gujurly duýýar welin, ähli zady özi etmäge çalyşýar, ol käwagtlar kömek etmek isleseň gaty görýär” diýip, agtygy Daňatar gürrüň berýär.
Hurmagözel daýza uruş ýyllaryny, frontda çagalaryň ulularyň ornuny tutan ýyllaryny ýatlaýar. Ol pagta meýdanynda işläp, mal bakypdyr, tylda kömek edipdir. Gaýduwsyz zähmeti üçin ol “1941-1945-nji ýyllarda Beýik Watançylyk urşunda gazanylan Ýeňşiň 65 ýyllygyna” ýubileý medaly bilen sylaglandy.
Hurmagözel daýza adamlara hyzmat etmegi we mukaddes ojagy gorap saklamagy ömrüň manysy hasaplaýar. Onuň 9 çagasy, 52 agtygy, 70 çowlugy we 2 ýuwlugy bar.
Aýallaryň ikisi-de parahat durmuşyň gadyryny bilmäge çagyrýar hem-de Türkmenistanyň Prezidentine we türkmen halkynyň Milli Liderine ýaşuly nesil barada edýän aladalary üçin minnetdarlyk bildirýär.
