Hindistanyň kosmos gözlegleri guramasy (ISRO) özüniň ilkinji kosmos stansiýasyny işläp düzmäge başlady. Ol “Bharatiýa Antarikş” (“Hindi kosmos stansiýasy”) adyny alar diýip, NDTV habar berýär.
Modullaryň uçurylyşy eýýäm ýakyn ýyllarda başlar, stansiýanyň özi bolsa 2035-nji ýyla çenli taýýar bolar. Hindistanyň premýer-ministri Narendra Modi ISRO-nyň öňünde uly maksat goýdy: Russiýadan, ABŞ-dan we Hytaýdan soň öz hususy kosmos stansiýasy bolan dördünji ýurt bolmak.
“Bharatiýa Antarikş” stansiýasy 2-4 astronawta niýetlener. Ony mikrograwitasiýa boýunça tejribeleri, astrobiologiki gözlegleri geçirmek hem-de Aýda ýaşamak mümkinçiligini öwrenmek üçin ulanmak meýilleşdirilýär.
Stansiýanyň agramy 20 – 400 tonna aralygynda bolup biler. Ol dört moduldan, 4 jübüt Gün panelinden we ekipažy ewakuasiýa etmek ulgamyndan ybarat bolar.
Komponentleri orbita uçurmak üçin Hindistanyň iň kuwwatly raketasy – Bahubali ýa-da Mark 3 ulanylar.
Şeýle-de, Hindistan 2040-njy ýyla çenli ilkinji hindistanly astronawty Aýa ibermegi meýilleşdirýär.
