ABŞ-nyň Ak öýüniň milli kiberhowpsuzlyk müdirliginiň (ONCD) edarasy möhüm programma üpjünçiligini döretmekde işläp düzüjilere C we C++ programma dillerini ulanmagy bes etmegi maslahat berýän hasabat çap etdi. Munuň özi bu dillerde ýady dolandyrmagyň howpsuzlygy bilen baglanyşykly howatyrlanmalaryň bardygy bilen düşündirilýär diýip, tomshardware.com-a salgylanýan 3DNews habar berýär.
Ýadyň nädogry dolandyrylmagy hüjümçilere kiber hüjümlerini amala aşyrmaga mümkinçilik berýän çynlakaý gowşaklyklara sebäp bolup biler. Muňa alternatiw hökmünde Milli Howpsuzlyk Guramasy (NSA) Rust, Go, C #, Java, Swift, JavaScript we Ruby ýaly ygtybarly ýat dolandyryşyny üpjün edýän programma dillerini ulanmagy teklip edýär.
Hasabatda 2019-njy ýylda Microsoft we 2020-nji ýylda Google tarapyndan ýüze çykarylan ähli howpsuzlyk gowşaklyklarynyň, takmynan, 70% -iniň ýadyň howpsuzlygynyň bozulmagy bilen baglanyşyklydygy aýdylýar.
Ak öýüň başlangyjy diňe bir teklipleri sanamagyň çäklerinden çykýar. Ol prezident Jo Baýdeniň 2023-nji ýylyň mart aýyndaky buýrugynda görkezilişi ýaly, milli derejede kiberhowpsuzlygy güýçlendirmek boýunça strategiki meýilnamany öz içine alýar.
Ýadyň howpsuzlygyny kepillendirýän programmirleme dillerini ulanmaga geçmek gowşaklyk töwekgelçiligini ep-esli azaldyp, sanly infrastrukturanyň ygtybarlylygyny we howpsuzlygyny ýokarlandyryp biler diýip, ONCD hasaplaýar.
TIOBE indeksine görä, programmirleme dilleriniň meşhurlygynyň seljermesi NSA tarapyndan teklip edilen dilleriň arasynda C #-niň meşhurlykda bäşinji, Java-nyň dördünji, JavaScript-iň altynjy we Go-nyň sekizinji orunda durýandygyny görkezýär. Bu maglumatlar maslahat berilýän dilleriň käbiriniň eýýäm hünärmen döredijiler jemgyýetinde giňden ulanylýandygyny we kabul edilendigini görkezýär.
