Microsoft-yň prezidenti Bred Smit Barselonada geçen “Bütindünýä mobil kongresinde” (MWC) “Emeli aňa elýeterliligiň ýörelgelerini” hödürledi, ol dünýäniň AI döredijilerine özüniň bulut AI infrastrukturasyna elýeterliligi kepillendirýär diýip, Reuters habarlar gullugyna salgylanýan 3DNews ýazýar.
Kompaniýa emeli aň ulgamynda innowasiýalary we bäsdeşligi höweslendirmek, şeýle hem Microsoft-yň bazardaky agalygy babatyndaky howatyrlanmalary aradan aýyrmak isleýär.
Işläp düzüjiler Microsoft Azure-de AI programmalaryny gurmaga we ýerleşdirmäge mümkinçilik berýän AI gurallaryna, modellerine we API-lerine girip bilerler.
Microsoft öz modelleri bilen bäsleşikde döredijileriň gizlin maglumatlaryny ulanmaz, şeýle hem Microsoft Azure müşderileriniň maglumatlary aňsatlyk bilen eksport edip we başga bir bulut hyzmatyny üpjün edijä geçirip biljekdigine kepil geçýär.
Microsoft-yň prezidenti Bred Smit kompaniýanyň AI-ni jogapkärli ösdürmäge ygrarlydygyny we onuň artykmaçlyklarynyň hemmeler üçin elýeterli bolmagyny isleýändigini aýtdy.
“Emeli aňa elýeterliligiň ýörelgeleri” Microsoft-yň AI-niň täzelikçisi we bazaryň öňdebaryjysy hökmünde jogapkärçiligini giňeltmäge gönükdirilendir. "Bulary neşir etmek bilen, dünýädäki guramalara we şahsyýetlere AI-ni ösdürmäge we jemgyýetiň peýdasyna peýdalanmaga mümkinçilik berýän tehnologiýalara giň elýeterliligi üpjün etmegi maksat edinýäris" – diýip, Smit sözüniň üstüni ýetirdi.
