Türkmenistanyň Oguz han adyndaky Inžener-tehnologiýalar uniwersitetinde talyp gyzlaryň arasynda Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Zenanlar birleşiginiň Merkezi Geňeşi, Türkmenistanyň Bilim ministrliginiň guramagynda Halkara zenanlar güni mynasybetli “Talyp gözeli – 2024” gözellik bäsleşigi geçirildi.
Bäsleşigiň maksady talyp gyzlaryň iş başarjaňlygyny, ugurtapyjylygyny, keşp gözelligini, halkymyzyň milli däp-dessurlaryny bilşini, durmuşa taýýarlygyny, medeniýetini, edep-ekramyny açyp görkezmekden ybarat boldy. Talyp gyzlar bäsleşigiň birinji şertinde Berkarar Watanymyzy, “Pähim-paýhas ummany Magtymguly Pyragy” ýylyny, öwrenýän hünärlerini wasp edip, dürli çykyşlary ýerine ýetirdiler.
Bäsleşigiň ikinji şertinde unaş kesmek boýunça, üçünji şertinde milli mirasymyz bolan keşdeçilik sungaty boýunça bäsleşdiler.
Uniwersitetiň habar bermegine görä, bäsleşikde Kompýuter ylymlary we maglumat tehnologiýalary fakultetiniň 1-nji ýyl talyby Gunça Jumageldiýewa ýeňiji bolup, baýrakly orna mynasyp boldy we jemleýji tapgyra gatnaşmaga hukuk gazandy.
