Türkmenistanyň Zenanlar birleşiginiň Merkezi Geňeşiniň hem-de Türkmenistanyň Kärdeşler arkalaşyklarynyň Milli merkeziniň guramagynda Türkmenistanyň Prezidentiniň “Ýaşlar - Watanyň daýanjy” atly ilkinji kitaby esasynda zenanlaryň arasynda “Ýaş türkmen zenanlary – Berkarar döwletiň mertebe tugy” atly bäsleşigi geçirildi. Bu barada Türkmenistan Halkara habarlar merkezi habar berýär.
Türkmenistanyň Jemgyýetçilik guramalarynyň merkezinde geçirilen bäsleşige ýurdumyzyň çar künjeklerinden 18-35 ýaşa çenli dürli pudaklarda zähmet çekýän zenanlar gatnaşdylar.
Bäsleşik üç şertden ybarat bolup, onuň 1-nji şertinde gatnaşyjy zenanlar “Ýaşlar - Watanyň daýanjy” atly ilkinji kitabyndan parçalary ýatdan aýtdylar.
Ikinji şertde zenanlar amaly-haşam sungatyny, däp-dessurlary, çeper el hünärini, milli keşdeçilik, halyçylyk sungatlaryny kämil derejede ösdürmekde, gadymy keşdeçilik mirasymyzyň ýiten nusgalaryny dikeltmekde, iň ajaýyp görnüşlerini ýüze çykarmakda, ýaýratmakda we nesilden-nesle geçirmekde hem-de ony giňden wagyz etmekde maşgalanyň, zenanlaryň orny barada anyk mysallar bilen gürrüň berdiler.
Bäsleşigiň 3-nji şertinde gatnaşyjylar “Ýaşlar - Watanyň daýanjy” atly ilkinji kitabynyň halka gowuşmagynyň şanyna toý tutmaly, kitap barada, kitabyň özlerinde galdyran täsirleri barada dabaraly wasp etmeli, öz ukybyna laýyklykda kitaba bagyşlanan aýdymyň, dessanyň, goşgynyň we gazallaryň üsti bilen buýsançlaryny täsirli beýan etdiler.
Ýeňijiler we bäsleşige işjeň gatnaşan zenanlar Türkmenistanyň Zenanlar birleşiginiň Merkezi Geňeşi hem-de Türkmenistanyň Kärdeşler arkalaşyklarynyň Milli merkezi tarapyndan Hormat hatlara we gymmat bahaly sowgatlara mynasyp boldular.
