Çarşenbe güni, 21-nji fewralda Ýewropanyň kosmos agentliginiň (EKA) ERS-2 hemrasy tas 30 ýyl orbitada bolanyndan soň Ýere gaýdyp geldi. Zond atmosferadan geçip, Ýuwaş ummanynyň demirgazyk böleginde suwa gitdi. Bu barada EKA-nyň resmi saýtyna salgylanyp, gazeta.ru habar berýär.
Kosmos agentliginiň maglumatlaryna görä, hemranyň bölekleri Alýaska bilen Gawaýi adalarynyň aralygynda Ýuwaş ummanyna gaçmalydy. Agentlik ERS-2 materiallarynyň radioaktiw ýa-da zäherli maddalary saklamaýandygyna ynandyrýar.
ERS-2 kosmosa 1995-nji ýylyň aprel aýynda uçuryldy we 2011-nji ýylyň sentýabr aýyna çenli işledi. Enjam Ýeriň gury ýerleri, buz örtükleri we ummanlary barada maglumat ýygnamak, şeýle-de tebigy betbagtçylyklaryň täsirine gözegçilik etmek üçin işlenip düzüldi. Zonduň öz göwrümi ýolagçy awtobusy bilen deň bolup, agramy 2516 kilogramma barabardy. Ähli ýangyç sarp edilenden soň gäminiň agramy 2294 kilogramma çenli azaldy.
Planetany zond bilen barlamak missiýasy tamamlanandan soň, enjam ýuwaş-ýuwaşdan aşak düşüp başlady we bu tas 13 ýyl dowam etdi. Bu tapgyrda EKA-nyň hünärmenleri hemrany dolandyryp bilmediler, sebäbi onda ýangyç galmady, ähli elektron ulgamlar bolsa öçdi.
