“Pari Sen-Žermeniň” we Fransiýanyň milli ýygyndysynyň futbolçysy Kilian Mbappe öz familiýasyny we geçiren goluny belleýşini täze haryt nyşany hökmünde hasaba aldyrmak isleýär. Bu barada Ýewropa Bileleşiginiň Intellektual eýeçilik edarasyna (EUIPO) salgylanyp, RIA Nowosti habar berýär.
Resmi arza 8-nji fewralda Parižiň hukuk firmasy tarapyndan berildi. Hüjümçi haryt nyşanynyň kosmetika, hojalyk serişdeleri, enjamlar, şaý-sepler, çap önümleri, deri önümleri, dokma önümleri, aýakgap, oýunlar ýaly harytlar we hyzmatlar üçin täjirçilik taýdan ulanylmagyny üpjün etmäge çalyşýar.
Mundan öň Mbappe adyny, inisiallaryny we meşhur şygarlaryny öz içine alýan ýedi sany haryt nyşanyny hasaba aldyrypdy. Indi ol öz familiýasyny we ellerini döşünde gowşuryp durup geçiren goluny baýram edişini haryt nyşany hökmünde ulanmakçy bolýar.
