Meizu täze smartfonlary işläp taýýarlamagy bes edýändigini mälim etdi. Munuň deregine kompaniýa öz güýjüni emeli aň tarapyndan dolandyrylýan “ertirki günüň gurluşyny” döretmäge gönükdirmek kararyna geldi. Bu barada ixbt.com habar berýär.
Xingji Meizu Group kompaniýasynyň başlygy we baş müdiri Şen Szyýuý brendiň ugruny üýtgetmek kararynyň smartfon bazaryndaky üýtgeşmeler bilen baglanyşyklydygyny aýtdy. Onuň belleýşi ýaly, indi sarp edijiler gurluşy seýrek ýagdaýda, ortaça 51 aýda bir gezek täzeläp başladylar, sebäbi indi dürli brendleriň telefonlary deňeşdirip boljak aýratynlyklar bilen hödürlenýär. Şeýle-de, ol bazardaky bäsdeşligi “ýaraglandyryş ýaryşy” bilen deňeşdirdi.
Netijede, Meizu smartfon öndürmek işinden ýüz öwürmek kararyna geldi, Meizu 21 Pro, Meizu 22 we Meizu 23 ýaly modelleriň üstündäki işler hem togtadyldy. Şen topar döretmek, resurslary paýlamak we önümi meýilnamalaşdyrmak ýaly iki ýyl taýýarlykdan soň, Meizu-nyň emeli aň pudagyny doly özleşdirmäge taýýardygyny belledi.
Meýilnamalar 2024-nji ýylyň dowamynda emeli aň döwrüne uýgunlaşdyrylan täze mobil operasion ulgamynyň işe girizilmegini hem-de emeli aňa esaslanýan ilkinji enjam önüminiň tanyşdyrylmagyny öz içine alýar.
