Microsoft tiz wagtdan Windows 10-y täzelenmeler bilen goldamagyny bes eder, Windows 11-i gurnamak üçin bolsa bazardaky köp kompýuterler minimal sistema talaplaryna laýyk gelmeýär. Canalys analitikleriniň hasaplamalary boýunça, şu sebäpli indiki ýyl 240 mln töweregi personal kompýuter aktuallygyny ýitirer.
Google bu pursatdan peýdalanmak kararyna geldi we könelişen PK ulanyjylary özüne çekip başlady. TechSpot-yň habar berşi ýaly, kompaniýa olara alternatiwa hökmünde öz ChromeOS Flex operasion sistemasyny hödürledi.
Bu Android programmalaryň goldawyny we Windows-soft emulýasiýasyny ýitiren asyl ChromeOS-yň birneme ýönekeýleşdirilen görnüşidir. Şol bir wagtyň özünde, ol enjam serişdelerini talap ediji däl we internete birikmesiz işläp bilýär (şeýle-de bolsa, onuň funksionallygy, esasan, soňka bagly). Korporasiýa operasion sistemasynyň Microsoft-yň operasion sistemasyndan energiýa taýdan 19% has tygşytlydygyny belledi.
Google öz sistemasyny ýene uzak wagtlap täzelenmeler we howpsuzlyk programmalary bilen goldamagy wada berýär.
ChromeOS Flex islendik Intel we AMD prosessoryny diýen ýaly goldaýar, 4 GB operatiw ýat we diskde 16 GB boş ýer talap edýär.
Brauzerden başga-da, OS tekst we grafiki redaktorlary, Microsoft Office ýaly paketleri, poçta müşderilerini, surat görüş serişdelerini, arhiwatorlary we beýleki programmalary göterýär. Ol käbir periferiýa enjamlary we ARM prosessorlary bilen “oňuşmaýar”. Flex Google-yň programmalar dükany bilen işlemeýär we adaty Android programma üpjünçiligi bilen işlemäge ukyply däl.
ChromeOS Flex-i gurnamak üçin gollanma Google-yň resmi saýtynda ýerleşdirildi.
