Kanadanyň Ontario şäherinden sekizinji synp okuwçysy köpden bäri dowam edip gelýän taryhy jedeli çözmäge kömek etdi. Ol taryhy ýyl ýazgylarynda beýan edilen Arhimediň «Ölüm şöhlesiniň» hakykatdanam netijelidigini subut etdi.
«Ölüm şöhlesi» Sirakuzanyň gabawy wagtynda (b.e. öňki 213-212 ýý.) ulanyldy. Rim harby gämileri şähere ýakynlaşanda Arhimed Gün şöhlesini duşman gämilerine gönükdirmek üçin aýlagyň boýunda aýnalary goýupdyr. Netijede, gämiler ot alypdyr.
Köp alymlar, şol sanda fransuz filosofy Rene Dekart bu hekaýany hyýaly hasaplaýardylar. Emma beýleki alymlar bu gadymy ýaragy döretmäge synanyşdylar.
12 ýaşly Brenden Sener synag wagtynda «Ölüm şöhlesiniň» stoluň üstünde ýerleşdirilen görnüşini döretdi. Birnäçe egreldilen aýnalary we LED stol çyralaryny ulandy. Serpikdirijiler 50 wattlyk ýylylyk çeşmesini kartonyň üstünde jemlediler. Gözegçiligiň esasynda her bir goşmaça aýnanyň goşulmagy bilen nyşananyň temperaturasynyň 2 gradus ýokarlanýandygyny görkezdi.
100 wattlyk lampa we dört aýna bilen geçirilen synag 10 gradus gyzgynlygy almaga mümkinçilik berdi. Okuwçy ýeterlik derejede güýçli ýylylyk çeşmesiniň we ideal burça gönükdirilen köp sanly aýnanyň kömegi bilen Arhimediň hakykatdan hem deňiz gämilerini ýakyp biljekdigi barada netijä geldi.
