ABŞ-nyň Patentler we haryt nyşanlary edarasy (USPTO) indi adamyň emeli aňyň kömegi bilen oýlap tapyşlar üçin patent alyp biljekdigi barada habar berdi. Şol bir wagtda emeli aňyň özi oýlap tapyjy hökmünde ykrar edilip bilinmez.
USPTO-nyň neşir edilen görkezmesinde emeli aň oýlap tapyşlarynyň “düýbünden patentlenmeýän” hasaplanmaýandygy aýdylýar. Bu ýagdaýda adamyň şol oýlap tapyşyň döredilmegine goşan goşandyna aýratyn üns berilýär. Hut adam neýroulgam üçin wezipeleri kesgitlemelidir.
Şeýlelik bilen, oýlap tapyjy emeli aň ulgamy däl-de, diňe fiziki şahs bolup biler. USPTO emeli aňyň oýlap tapyş işinde ulanylandygy baradaky maglumaty aýan etmegiň hökmany däldigini hem belleýär.
USPTO-nyň bu çözgüdi patent hukugynda täze eýýamy açýar we emeli aň ösüşinde möhüm ädimi aňladýar.
